Sjanse for noko negativt?

Det har vorte vanleg å bruke «sjanse for» om både positive og negative følgjer, men det er best å bruke «fare for» når ein siktar til dei negative.

Sjanse er oftast noko positivt; berre tenk på uttrykket å få sjansen til noko. Det å ta sjansar kan rett nok få eit negativt utfall, men målet med handlinga er positivt. Det er det sentrale.

Negativt: fare eller risiko

Det er fint om ein kan skilje mellom faren for å bli smitta og sjansen for å bli frisk, eller mellom sjansen for/til å vinne og faren for å tape. Kort sagt: Der fare for fungerer greitt, er det ingen grunn til å velje sjanse.

Når vi er inne på fare: Vi treng heller ikkje nytte ordet risiko så ofte der det enklare ordet fare duger. Risiko kan gjerne reserverast for risikoanalyse og andre faglege samanhengar.

Nøytralt eller ope: sannsyn og andre formuleringar

Når det er heilt ope om eit mogleg utfall er positivt eller negativt, nyttar vi sannsyn (bokmål sannsynlighet), men det òg høver best i litt tekniske eller statistiske samanhengar. Vi kjem ofte kome langt med kvardagslege formuleringar som «det er truleg / lite truleg at», «det er mogleg at», «det kan hende at»

Dette avissøket viser bruken av ymse ord for sannsyn sidan 1960-åra. Sannsynet for å sjå «sjansen (for)» på trykk er meir enn dobla, og det er nok ikkje fordi dei positive utsiktene har vorte fleire.