ordbøkene.no
SøkHøyring om framlegg til rettskrivingsendringar
Språkrådet har sendt ut til høyring ein del framlegg til endringar i rettskrivinga for nynorsk og bokmål. Høyringsfristen er 7. april, og alle kan sende inn høyringsfråsegn.
Dei føreslåtte endringane har litt ulik motivasjon. Ein del av dei skal bringe normene nærare språkbruken slik han kjem til uttrykk i tekstar. I nokre tilfelle er det føreslått å stramme inn normene ved å ta ut former som er lite brukte. Endeleg er nokre av framlegga motiverte av eit ønske om å gjere rettskrivingsnormene enklare ved å fjerne unntak.
Føreslåtte endringar
Vi føreslår å justere normeringa av grammatisk kjønn (genus) for ein del substantiv, mellom andre prolaps, snufs og stress. For nokre av orda går framlegget ut på utviding av norma fordi dei er ein del i bruk med eit kjønn som i dag er unormert. For andre ord føreslår vi innstramming fordi eit normert kjønn er lite brukt i tekstar.
Det er framlegg om å endre normeringa av ein del importord frå engelsk med kort vokal, til dømes bag(g) og hit(t). I dag kan ein velje mellom å skrive desse orda med éin eller to konsonantar. Bruksdata viser at enkel konsonant er vanlegast i utgangsforma (bag, hit), medan dobbel konsonant er klart vanlegast i bøygde former (baggen, hitten). Framlegget er å halde på valfridommen i utgangsforma, men gjere dobbel konsonant obligatorisk i bøygde former: bag(g), hit(t), men berre baggen og hitten. Dette gjeld både nynorsk og bokmål.
I nynorsk er det framlegg om å gjere formene lykkje og løkke valfrie i alle tydingar. I dag er norma på dette punktet unødvendig komplisert og heller ikkje i tråd med den skriftlege bruken i praksis.
I bokmål gjer vi framlegg om å endre normeringa av forleddet vann-/vass- i samansette ord. I dag har dei fleste samansetningane valfritt vann- eller vass-, medan nokre har berre vass-. Vi føreslår å la vass- bli ståande som normert form berre der ho er mykje brukt, anten som eineform i tilfelle der vass- dominerer klart (til dømes i vassdrag og vasstrukken), eller som valfri form i ord der fordelinga mellom vann- og vass- er jamnare (til dømes i vannekte/vassekte og vannkvern/vasskvern). Vass- vil òg framleis vere eineform i artsnamn, som vassarve og vasskryp. I alle andre samansetningar blir vann- eineform.
Om normering av norsk
Dei overordna prinsippa for normeringa av dei to norske skriftnormene er sjølvstende og stabilitet. Sjølvstende vil seie at nynorsk og bokmål skal normerast kvar for seg, på grunnlag av eigen tradisjon og skriftleg praksis. Stabilitet vil seie at rettskrivingsnormene i hovudsak skal liggje fast, utan store og gjennomgripande endringar. Det er likevel høve til å gjere justeringar dersom språkbruk eller systemomsyn tilseier det. Språkrådet forvaltar rettskrivinga og gjer bindande normeringsvedtak. Ettersom endringar i dei offisielle rettskrivingsnormene har viktige konsekvensar for ålmenta, blir framlegg av dette slaget systematisk sende ut til høyring. Alle framlegga blir presenterte i høyringsnotatet; her omtalar vi kort nokre av dei.